Trebiñuko plazan hasiko da ekitaldia arratsaldeko bostetan, eta bertan egongo dira Asier Amondo AEKren Artezkaritza Kontseiluko kidea eta Edurne Brouard Korrika 17ren arduraduna. Txalaparta doinuek eta Argantzungo abesbatzak egingo diote harrera mezu sekretua eramango duen lekukoari, eta Manex Agirre Arabako Bertsolari Txapelketako irabazlearen bertso eta dantzarien aurresku artean omenaldi xumea eskainiko zaio Korrikari. Kale animazioa eta umeen txokoa ere ez dira faltako Trebiñuko hasiera eguneko jaian.
Hasiera ekitaldia Trebiñu herrian izango bada ere, jaiak Argantzunen jarraituko du, herriko frontoian arratsaldeko zazpietan hasiko den kontzertuarekin, Aske, Herrikada, Gose eta Betagarri taldeen eskutik.
Korrika 17k, Trebiñutik aterata, 17:30ean emango ditu bere lehen urratsak Argantzun aldera (18:27), eta berriro itzuliko da Trebiñura (19:37). Lehen kilometroetako lekuko eramaileak inguruko euskalakariak izango dira: Trebiñuko alkate Inma Ranedok eramango du lekukoa Udalaren kilometroan; Arabako Foru Aldundiko kultur diputatu Malentxo Arruabarrenak ere bai, Aldundiak lagunduta euskara ikasten ari diren sei etorkinekin batera; Trebiñuko eskolako guraso elkarteak; Trebiñu Konderriko koadrila guztiak; Argantzuko Udalak eta ikastolak; merkatariak; nekazariak; dantzariak; kirolariak…
Arabako Mendialdetik, Kanpezu (00:14), Maeztu (01:38) eta Azazeta (02:17) igarota, Lautadan barneratuko da Korrika 17: Dulantzi (03:22), Agurain (04:51), Zalduondo (05:48), Egino (07:11). Sakanan barrena, Ziordiatik sartuko da Nafarroan bihar goizeko zazpi eta erdiak aldera.
Gasteiz antifaxistatik salatu nahi dugu guardia Zibilak zenbait kontrol ezarri dituela, Uzkianon eta Gazteizko portuan hain zuzen ere, Argantzura doan jendea oztopatzeko asmoz. Utzi bakean euskal Herria!
