Halaber, ostegunean, urtarrilak 20, Hego Euskal Herriko lau hiriburuetan eguerdiko 12´30etan Gernikako Akordioan bildutako eragileen ordezkaritza bana Estatu Ordezkaritzara joango da bertako arduradun nagusiari atxilotutakoak lehenbailehen inkomunikazio egoera bertan behera uzteko eta askatzeko eskatuz. Herritar guztiei arratsaldeko 7´30etan herri guztietan ohiko tokietan egingo ditugun elkarretaratzeetan parte hartzeko deia egiten diegu. Hiriburuetan elkarretaratzeak honako tokietan izango dira: Gasteizen Andra Mari Zuriaren plazan, Donostian Bulebarrean, Bilbon Arriaga antzokiaren aurrean eta Iruñean Gaztelu plazan.Gernikako akordioko sinatzaileok adostutako irakurketa:
GERNIKAKO AKORDIOA IZENPETUTAKO ERAGILE POLITIKO, SINDIKAL ETA SOZIALEK ATZOKO ATXILOKETAK SALATUZ LARUNBAT HONETARAKO NAZIO MANIFESTAZIOA DEITZEN DUTE.
Lehenengoz eta behin, Gernikako AKordioa izenpetu genuen eragile politiko, sindikal eta sozialok atzo goizean ezagutu ditugun atxiloketak salatu nahi ditugu. Nafarroako jendarte esparru desberdinetako jarduera politiko ezagunean aritzen diren herritarrak bortizki atxilo hartu eta beraien etxeetatik eraman dituzte. Berriro ere euskal herritarrek arrazoi politiko hutsei erantzuten dien jazarpenaren ondorio larriak nozitu egin dituzte.
Gaur egun ETA erakunde armatuak urtarrilaren 10ean ezagutarazitako su-eten iraunkor, orokor eta egiaztagarriaren ondoren Estatuak ere urratsak eman behar ditu, Euskal Herria bake eta normalkuntza politikorantz egiten ari den bidean oztopoak jarri beharrean. Are gehiago, gure ustez, atzo goizean euskal herritarren aurkako sarekada berri honek Euskal Herrian dagoeneko abian dagoen prozesu demokratikoa oztopatzea eta galaraztea helburu du.
Info. gehiago: http://www.etxerat.info/albisteak.php?id_saila=7&id_edukia=1370&lang=eu
